三色蛋

今個農曆新年過得十分之“特別”，相信大家過去一星期大部分時間都係靜靜地喺屋企度過。一日三餐要喺屋企解決嘅日子似乎仲會持續一排，大家不妨喺住家菜落啲心思，即使用普通嘅食材都可以煮出好滋味。

今期老周我想同大家分享吓蒸蛋——一個易學難精嘅餸菜。成日都有師奶朋友問我點先可以蒸到一碟滑捋捋嘅蒸水蛋。訣竅是：除咗一定要處理打蛋產生嘅泡，仲要記得蒸嘅時候鑊蓋同個鑊要留返少許空位，將多餘嘅蒸氣排走，先可避免到出現氣孔，不會搞到表面好似豆皮咁。

今次介紹大家整返味簡單嘅蒸三色蛋，材料有：雞蛋兩隻、熟鹹蛋一隻、皮蛋一隻、葱花少許、鹽半茶匙、胡椒粉少許及麻油少許。將鹹蛋同皮蛋切粒備用，雞蛋加入大半碗水一齊打，加入調味料撈好，倒入碗時隔走蛋泡，再加入鹹蛋同皮蛋粒用中火蒸二十分鐘，鋪返啲葱花就大功告成。呢個餸撈飯一流，包保大人細路都啱食。

周 中（澳門美高梅金殿堂烹飪顧問）