嘻哈大笑

今日係大年初二，老周先同大家拜個年，祝各位新年快樂，鼠年行大運，年頭好到年尾，生意興隆！喺呢個時勢，最緊要都係人人身體健康，無病無痛就最好啦。

相信大家呢幾日都會陸陸續續同親朋好友食開年飯，為新一年開返個靚頭，咁就當然唔少得各式開運好意頭菜式。做人最緊要開心，老周就介紹一道名為“嘻哈大笑”嘅菜色，寓意笑口常開！

呢道菜其實就係取“哈”嘅諧音，用蝦嚟做主角，容易煮又受歡迎；而且比起其他新年嘅傳統餸菜，蝦都係比較健康嘅食材，呢味餸又加入荷蘭豆同芹菜，可以平衡下過年期間多油重味嘅飲食。材料有：急凍蝦仁半磅、荷蘭豆四両、芹菜二両、薑和生蒜茸各少許、葱、鹽半茶匙、蠔油一茶匙、生粉一湯匙，以及酒少許。

做法：先將蝦仁用水浸開，逐一除去蝦腸，再用半茶匙鹽、少許生粉同埋油醃好；荷蘭豆去梗，芹菜切度。蝦仁輕輕用熱水灼熟待用；落油起鑊，放入荷蘭豆同芹菜炒香，再放入蝦仁同其餘調味炒，“贊”酒，最後就用生粉打芡，就可上碟。

周中（澳門美高梅金殿堂烹飪顧問）