鄧月平增廿磅演跛腳妹

鄧月平(Larine)早前為咗拍陳果新戲《墮胎師》，由一百〇一磅夾硬谷肥至一百四十三磅，兩個月極速增肥，包括瘋狂食唔停、食物唔肥唔放入口、一日六至七餐是必需的；睡前的宵夜有忌廉、雪糕，早餐更豐富，瞓醒食麻辣火鍋，餘下食材做炒飯，留返午餐繼續食。

Larine在戲中是個壞腦肥妹，四處呃呃騙騙。導演陳果特別要求她增磅、帶眼鏡、拎柺杖來配合角色，並以肥妹學生妹造型影海報。對年僅廿二歲的Larine來說確係極大挑戰，肥肥瘦瘦的辛酸過程亦不足為外人道。Larine表示：“成個增肥過程中，我媽咪見到我肥到咁都有喊過。通常媽咪都係叫仔女食多啲，但拍完套戲後，媽咪唔畀我食嘢。起初我恃住自己青春冇嘢驚，但之後開始荷爾蒙失調，結果仲要用好多時間調理身體。”

雖然犧牲甚大，但Larine還是很喜歡這個肥妹仔角色：“我記得影后曾美慧孜講過，戲比天大！我覺得終於有個脫胎換骨的鄧月平讓大家見到啦！只係當時增肥好低調、好保密，令好多朋友以為我要退出娛樂圈，仲問點解我會自暴自棄、搞到咁肥。”