膠袋收費可減塑

人生百態盡顯露

昔日買餸藤籃載

萬能鹹草紮瓜菜

塑膠污染嚴重，日漸威脅全球。澳門遲到好過冇到，去年十一月中實施限供膠袋法，經三月運作，市民漸適應，惟仍有人未知膠袋每個收一文。

膠袋要收錢，社會多百態。有顧客光顧食店，用購物袋將外賣盒放袋內；在街頭，見有顧客拿着磅包行街，初覺異相，然無傷大雅，知你環保，唔會笑你“風吹皇帝褲浪”，孤鬼寒。市面見老人家百寶袋盡出，知慳識儉，成環保主力軍。

年輕人似無所謂，總覺購物袋累贅，唔想清洗，一文就一文。特別到粥麵店外賣，一定要膠袋。但亦有人手捧膠杯從粥麵店出來，若是粥品，真佩服其指功耐熱力。

有食客投訴，本來到食店外賣，一個膠袋可裝兩食物，但店員卻分兩袋裝，畀足兩文，有濫收之嫌。

亦有口痕友話，食店用膠袋裝載食物，原是預出之物，現時要收錢，食店無端端發達，尤其外賣店，收膠袋錢賺到笑，建議將錢歸環保部門，當作扶助減廢之用。在下認為毋須太計較，就當另類扶助中小企。隨着時日推移，法例亦須適時完善，膠袋只是開始，諸如飯盒、膠杯當垃圾，危害性更大，但市面卻最常用，如何減塑，確考起人。

聽老一輩講，上世紀五六十年代，未有膠袋面世，市民買餸用藤籃；買魚鹹草穿魚嘴魚腮，吊吊揈行得；買菜更手熟，賣菜妹銀牙輕咬鹹草，紮菜快夾妥；買豬肉紙包放餸籃可也。昔日藤業盛行，藤籃買餸方便。出世遲朋友，或不知買餸籃、鹹草為何物。

當局限膠袋目的，在於提高市民環保意識，陸續減塑。地球只一個，人類應保護。或許有人覺天氣變化事小，冬季應冷反熱無所謂，但為下幾代着想，為人為己，應作些貢獻！

羅倫斯