過年三糕

一聽到“三高”，大家係咪嚇到個心都離一離呢？其實老周我係想講過年必備嘅“三糕”——年糕、發糕同埋蘿蔔糕。年糕年糕年年高，寓意小朋友快高長大，大人就事業步步高升，咁好意頭，過年點都要食返幾件應節嘅。

話雖如此，新年啲賀年糕點款款都一式一樣，冇喱新意，市面上好多款都多油又多糖，實在唔係咁健康，亦唔係個個人都咁有興趣。自家製嘅話當然可以食得健康啲，不過我都明整糕又真係十分之費時，就唔係個個都有時間整。所以，今年我哋酒店嘅點心總廚就決定為大家搞搞新意思，推出咗一款全新口味“有機伯爵茶紅糖年糕”，為傳統糕點加點新意思。

呢款新年糕選用咗英國高級伯爵紅茶葉，仲有來自北海道嘅高質牛奶，用料上乘。我親自試過味，有傳統年糕嘅香滑口感，茶味濃郁甘香，唔會過甜，食落仲有啲似飲緊絲襪奶茶，絕無誇張。大家想試吓就記得趁早落單，費事蘇州過後冇艇搭啦！

最後老周我都婆媽地提一提大家，過年食品好多都高糖高脂，咪食過量，費事真係搞到“三高”啦！

周 中（澳門美高梅金殿堂烹飪顧問）