林雪到中國冰室懷舊

林雪前日收工後，特意去了“中國冰室”開飯，當他走上樓上雅座的長檯位，就有街坊笑說：“肥沙，你搵番把槍未？”林雪亦搞笑回應：“未呀，仲搵緊。”之後他點了沙爹牛肉麵，又不時以手機影相打卡，期間食客輪流與林雪合照，他亦來者不拒。

中國冰室是不少港產片拍攝外景地，導演杜琪峰的作品亦有不少在此實地拍攝，當中令觀眾最難忘的一定係二○○三年的《PTU》。片中林雪飾演失槍差佬“肥沙”，與扮PTU的任達華及邵美琪於這家冰室內有對手戲。當年劇組前前後後在冰室內拍了接近一個月，所以“肥沙”林雪對這間茶餐廳甚具情意結。

不過，屹立旺角半世紀的中國冰室將於日內結業，所以他特意去緬懷一番。林雪很感慨地說：“其實呢間茶餐廳先至係明星，因為香港好多電影畫面都有佢。我哋通常都係夜晚九點後才開工，等呢度閂門才開始拍，廚房都閂咗，冇得叫嘢食，都係叫外賣。阿杜好鍾意呢度，有香港特色地方，我都有幾部戲在呢度拍，呢幅牆磚、好多嘢以後都搵唔到啦。”他直言以前拍《PTU》時比現在瘦一半，所以新一年為健康着想，要努力減肥。