栗子炆雞

過兩日就係新一年，老周我先喺到祝大家新年快樂，身體健康！呢幾日又凍返，終於有少少冬天嘅感覺，條街見到賣炒栗子嘅小販，凜冽嘅寒風下食返包暖笠笠、香噴噴嘅糖炒栗子，真係冬天獨有嘅滋味！

其實栗子仲係一樣好多用途嘅食材，可以用嚟整甜品之餘，炆肉、炒餸、煲湯都得，而且仲有補腎健脾嘅功效，好適合冬天食用。今期我就教大家整返味家常嘅栗子炆雞，等大家可以過一個暖笠笠嘅冬天。

材料：雞半隻，冬菇四隻，蒜片、薑片、葱段適量，蠔油一湯匙，糖一茶匙，酒少許，生粉一湯匙，鹽半茶匙；另外準備適量嘅蠔油、糖同生抽用嚟醃肉；栗子就鍾意食幾多落幾多啦。做法：先將冬菇浸軟，雞肉斬件，洗淨抺乾，用適量嘅蠔油、糖同生抽醃約十五分鐘，然後落鑊將雞皮煎至金黃色，盛起備用。薑葱蒜落鑊爆香後加入栗子，然後加入雞件炒一炒。之後落半碗水同除咗生粉以外嘅調味料，蓋上鍋慢火炆約十至十五分鐘，最後加生粉水打個芡，就可以上碟啦。除咗炆雞，炆排骨同鴨一樣得。

（澳門美高梅金殿堂烹飪顧問）

周 中