荷芹炒臘味

今日就係冬至，所謂“冬大過年”，做冬就梗係唔可以求其，一家人齊齊整整，圍住張大圓檯食個大餐，咁先似過節嘛。如果有臨急抱佛腳嘅朋友仲未諗到今晚做冬要整咩餸，老周我就推介用臘味煮返味簡單快捷嘅家鄉菜“荷芹炒臘味”，簡單得嚟又暖身，招呼親朋戚友亦絕對唔怕失禮。

冬天最受廣東人歡迎嘅食材非臘味莫屬，常見嘅臘腸、臘肉、臘雞同臘鴨除咗可以放喺飯面蒸熟整臘味飯或者煲仔飯之外，用嚟炒菜都一樣咁冶味，食落仲無咁油膩。

材料有：臘腸一條，臘肉半條，荷蘭豆或甜豆四両，芹菜一棵，薑片同葱切度，蠔油一茶匙，鹽半茶匙，酒少許，生粉兩茶匙。做法：首先將臘味洗乾淨，瀝乾水，隔水蒸熟，然後切片；將荷蘭豆撕去夾根，芹菜切根，然後再切段。材料準備好後，起鑊放入荷蘭豆、臘味同其他材料一齊醬炒。炒匀後加少少水，再放芹菜落鑊炒，然後放入調味料。最後用生粉打個芡，再“贊”酒上碟就大功告成。

（澳門美高梅金殿堂烹飪顧問）

周 中