張繼聰讚謝安琪廚藝非凡

近日忙於開騷的張繼聰，趁空檔為快餐店品牌拍攝廣告，仲有機會與“最愛”電單車同場。不過一向貪靚的張繼聰笑言，電單車有甜蜜負擔：“今次部電單車係自己鍾意嘅Style，由車身嘅拉花、頭盔，我其實都有一個係一樣嘅！揸電單車拍攝係開心，可以寓工作於娛樂，但係拍廣告就會麻煩啲，因為戴完頭盔後，髮型亂晒要重新‘Set頭’，比較花時間。”

張繼聰自爆只懂煮麵“醫肚”，但就大讚太太謝安琪廚藝非凡：“太太煮嘢食係叻嘅，佢都會為屋企人煮唔同嘅食物、唔同地方嘅美食。但佢唔係淨係煮，仲會整埋擺盤，襯埋啲餐具咁樣，好似去咗餐廳食嘢，好勁！有時我都會帶佢出去食飯，都係想畀機會佢偷吓師。”

呢日拍攝快餐店品牌廣告，勾起張繼聰不少“童年回憶”，仲自認食得“奄尖”：“以前中學‘打鐘’就急急腳行去霸位，當年十數元一個午餐，可以出街食飯就會覺得好開心，通常都係食雜扒餐、焗飯，因為夠快手，呢啲都係我嘅摯愛。”