名畫竊賊成英雄

百一十五年前今日，巴黎羅浮宮失竊，名畫《蒙娜麗莎》被盜。消息哄動全球，成二十世紀最著名藝術品盜竊案之一，致令藝術大師畢加索也成疑犯遭傳訊。

此案橋段猶如拍電影。意大利鏡架佬佩魯賈匿藏館內，趁翌日閉館，除下《

蒙娜麗莎》鏡框，名作捲藏大衣，施然離去。開館之日，驚現空牆，蒙娜麗莎失蹤了！成個巴黎滾熱辣。

佩公如斯熟手，原來此畫由佢維修裝框，然亦留下手尾。名畫先藏巴黎家中，兩年後轉至意大利求售，卻遭買家報串被捕。驗玻璃指模，仲唔係你！審訊時此公大義凜然：“此畫本屬意大利，被拿破崙搶去。今回歸祖國，理所當然！”此說被意國人讚為民族英雄。

畫作尋回，意國巡迴展出，意人高呼《

蒙娜麗莎》“

凱旋歸國”。因屬法國資產，不得不歸還羅浮宮。佩公因此“義舉”，僅輕判年餘。十四年後殁於心臟病，寂寂無聞。廿二年後另一同名者逝，新聞界竟才誤發佩公訃聞。

西門公子