首度與胡鴻鈞赴美加開騷

吳業坤靠歌迷熱情克服時差

吳業坤（坤哥）與胡鴻鈞(Hubert)於今年夏天展開《Kwan-derful Moments》美加巡迴演唱會，先後登陸多倫多及洛杉磯。兩位多年好友首度合體將個人Show帶到海外，除了同台合唱多首人氣名曲、分享多年真摯友情之外，現場更吸引數千名歌迷到場支持，反應極為熱烈。

談到今次美加巡演，兩位不約而同表示“時差”是最大挑戰。坤哥透露行程十分緊湊：“去到多倫多時真係非常眼瞓，上台前一直喺度頂緊時差。好彩多倫多觀眾嘅熱情直接將我‘灌醒’。去到第二站洛杉磯，時差終於適應咗，兩場都唱得好盡力，估唔到遠在海外都有三、四千人支持，真係好感動。”

今次美加之行，坤哥亦有帶太太同行。他甜笑表示有太太在身邊照顧非常安心：“佢幫我收拾行李、打理好多嘢。完成演唱會後，我哋仲去咗Las Vegas（拉斯維加斯）玩，又順道參觀咗大峽谷同羚羊峽谷等景點。返港後會緊接準備上海演唱會，同埋《試真啲》嘅拍攝工作。”

胡鴻鈞則笑言今次美加之行幾乎全程處於“昏昏哋”的狀態：“由出發到離開都好似仲未轉到時差，不過都好，返到香港就唔使重新適應。好在歌迷極度熱情，令我同坤哥一上台就可以擊退Jet lag（時差），非常精神。”提及行程中的趣事，胡鴻鈞分享在加拿大與當地樂隊彩排時，Band Leader透露部分樂手不懂中文，因此特意將他們的中文歌名全翻譯成英文來溝通，令他們大感新鮮與搞笑。

此外，兩人更在跨國行程中，經歷了一場“驚心動魄”的機場插曲。胡鴻鈞透露：“喺加拿大飛去美國過境時，無諗過海關會排咁長隊，我哋係去到臨起飛前十分鐘先至成功登機，過程真係好緊張刺激。”幸好最終兩場演出均順利完成，臨走前亦爭取到半日時間在洛杉磯到處觀光，為今次的美加巡演劃上圓滿句號。