生日同事送驚喜

霍汶希壽星女狂派利市

英皇娛樂集團行政總裁霍汶希(Mani)前日牛一，一向愛錫旗下藝人的她，今次被公司上下聯手反過來驚喜。曾比特(Mike)、湯怡(Kathy)、楊天宇(Angus)、李靖筠(Gladys)、曾傲棐(Arvin)、海兒(Hedy)、黃明德(Dark)、劉若寶(Polly)及一班同事秘密籌備派對，等Mani開完會返公司即場送上驚喜。

Mani一踏入公司門口，曾比特便即以結他跟黃明德彈唱生日歌，之後帶領全公司大合唱，連英文、廣東話及國語三個版本都唱齊，辦公室頓時變成小型演唱會。楊天宇向Mani自爆：“我買咗生日禮物畀你，但係唔記得帶擺咗喺屋企。”Mani一聽即刻追住Angus大叫：“拎個銀包出嚟，唔該。”場面搞笑。至於開餅店的湯怡，就親手製作蛋糕，Mani一見大讚：“呢個係全香港最好味嘅蛋糕，我話畀你哋知，仲要係靚女嘅出品。”認真畀面。切蛋糕許願時，Mani說：“祝各位所有藝人都大紅大紫、工作順利。”

影完大合照，向來跟藝人同事打成一片的Mani自動波話：“拎個電話出嚟搶利市。”全場瘋狂歡呼。不過因為並非所有同事都在同一個群組，最後決定改為派實體利市，同事們都乖乖排隊，氣氛熾熱，派利市期間，Mani忍不住笑說：“點解無端端變咗新年嘅？點解生日會係我派錢嘅？CFO快啲攞啲錢出嚟啊，有冇錢呀請問。”由於事前完全未有準備，手上的利市派完後，Mani霸氣話：“派現金。”點知連現金都不夠，她邊摷袋邊抱頭問：“有冇人有現金呀？”引嚟全場爆笑，不過她即刻補充話：“大家記住，唔係講錢嘅問題，係Lucky Money。攞到Lucky Money就大紅大紫身體健康事事如意要乜有乜。”

正當大家玩得開心之際，英皇集團主席楊受成博士剛好“路過”，即裝兇問Mani：“你好大膽喎！生日都唔請我！”Mani無奈回應：“唔係呀，我唔知道佢哋surprise我呀，我招架唔住啦，攞晒啲錢出嚟派啦。”楊博士見狀即刻問：“使唔使要錢呀？”更即時摷袋準備出手，非常豪氣。然後Mani親手遞上利市給楊博士。楊博士接過利市就搞笑話：“可唔可以補償返我三十幾年嚟你呃我啲錢呢？多謝。影相先。生日快樂！”