布志綸拒囝囝做個唱嘉賓

早前布志綸舉行個唱叫好又叫座，日前宣佈舉行音樂會Part 2，將於七月二十五日假Backyard@AXA WONDERLAND舉行。

這次音樂會在戶外舉行，布志綸預期氣氛夠晒“Chill”：“戶外騷可以邊飲邊食，最緊要今次除咗Band之外，仲邀請咗DJ做Remix，希望撞到啲新火花。今次戶外騷屋企人都會嚟感受下氣氛，阿仔依家慢慢大個，佢成日都好想表演，但係都要睇佢自己肯唔肯練習，今次未知道會係點，暫時要求佢做返台下觀眾，睇下老竇同咁多人一齊Rock嘅場面，同大家一齊Chill、一齊享受音樂。”

布志綸話一場“唔夠喉”，歌單有太多選擇，但團隊將所有精力“精煉”到台上：“好多歌迷真係陪住我一齊成長，經歷人生嘅高低起跌。睇住大家由當年小學、中學、大學生，到依家踏入社會、甚至做埋父母，呢十幾年嚟大家一齊經歷咗好多。我希望今次音樂會除咗勾起大家‘聽住我啲歌長大’嘅共鳴，最重要係帶畀大家好歡樂、好正面嘅力量去面對人生。音樂本身就係最好嘅‘天然能量補充劑’，只要享受好音樂，心態自然會年輕。”