足總盃開戰

賓菲加“兵”來將擋

【本報消息】本地甲組足總盃開戰，今晚率先展開十強戰。衛冕的賓菲加在今晚九時，尾場迎戰炮兵。賓菲加今季聯賽失意，轉戰足總盃誓全力開“炮”，闖過衛冕第一關。

賓菲加闖衛冕首關

足總盃揭開戰幔，今晚七時率先在氹仔運動場進行兩場十強賽。上屆冠軍賓菲加，在尾場出擊鬥炮兵。賓菲加今季聯賽表現失準，季初一度更身處護級位置，幸人腳到齊後季中逐漸回勇，不過足總抽籤運氣平平，要踢多一場十強賽。賓菲加人腳實力比炮兵好，老將射手艾美達仍為球隊入球保證，加上梁灝然、大衛及菲臘比支持，防線高俊配合吳家興等把關，人腳同樣比炮兵好。

炮兵去季勇奪乙、丙組足總盃冠軍，不過今季聯賽重上甲組，實力與其他球隊有距離，目前要為護級而戰，中前場林毅東、達碧等人掛帥，人腳與賓菲加有差距。賓菲加近月越戰越勇，睇好闖過衛冕第一關。

恆勢早場激鬥澳大

早場七時有恆勢鬥澳門大學。恆勢今季聯賽暫時發揮平穩，中前場有曉高、奧斯及張啟駿等掛帥，火力不差。防線靠張梓謙、劉柏堅及薄田阿蘭把關，表現同樣有保證，有力睇高半線。對手澳門大學今季大部分主力離隊，表現大跌，聯賽現時排榜尾，想爭取護級困難重重，但一班年青球隊近戰表現逐漸提升，前線潘思杰、門將陳傳湛等發揮不差，面對近戰表現稍稍回落的恆勢，澳大並非無力一戰。