赴泰國與粉絲會面

黃宗澤寓工作於娛樂

黃宗澤(Bosco)、陳瀅、吳業坤及胡鴻鈞(Hubert)，齊齊到泰國芭堤雅出席活動，各人工作之餘又可以享受當地火辣陽光與游水特別開心。適逢520情人節，陳瀅更找來黃宗澤齊做心心手勢，祝粉絲情人節快樂。

黃宗澤到泰國芭堤雅出席活動，跟當地粉絲會面，全場坐滿三千多人，場面十分墟冚，陳瀅、吳業坤與胡鴻鈞則為活動擔任表演嘉賓。黃宗澤甫出場，場面哄動，他與觀眾分享成為“凍齡男神”的保養心得。他認為健康、自律及保持好心態好重要，當然外在狀態都需要科學方法持續管理，原來“男神”真的不易做。

陳瀅自上月跟蔡潔一齊開騷後，再上台唱歌，表現得更有自信，她身穿一條背心短裙，盡顯完美體態。獨唱張敬軒的《斷點》後，她再跟坤哥及胡鴻鈞合唱一曲《友共情》，台下歡呼聲與掌聲不絕。

提到此行感覺如去度假一樣十分寫意，黃宗澤笑說：“嚟到泰國芭堤雅，寓工作於娛樂，梗係順便游下水，點可以唔游水呀，仲曬埋太陽口添。520對藝人嚟講冇咩特別感受，日日都開工就最好，人人有工開，520有工開，521又有工開，最緊要係620（邵氏高層樂易玲）畀到工我哋開。跟住都會馬不停蹄飛去第二度繼續工作，我有工開就開心，今次有工開之餘仲有得旅行游水、陽光、海灘，就更加開心。”

吳業坤此行特別提早一日到泰國，先行到曼谷拜神及還神，然後再到芭堤雅。在芭堤雅坤哥日日都去游水，所以曬黑了，他揚言今次工作好有度假Feel：“因為已經好耐冇嚟泰國，上次嚟泰國已經係疫情前，所以今次可以工作之餘又有娛樂，真係好開心，同埋啲觀眾好熱情，所以希望公司以後可以多啲咁嘅工作就最好啦。同埋呢度好多華人，都知道520呢個節日，特別熱鬧，（有冇送花畀老婆？）冇呀，同佢講咗返香港會補祝。”

至於胡鴻鈞今次是首次到芭堤雅，大讚所住之酒店房對住個泳池，所以一行出去露台就可以游水，好方便：“雖然天氣真係好熱，但有嗰種陽光與海灘度假嘅感覺，真係唔似嚟工作，似成班同事一齊去團建咁。”