戶外開騷撐廣東歌

張馳豪壓軸出場騷肌肉

MIRROR成員邱傲然、王偉俊、張馳豪、穎喬、周智敏及柯雨霏，攜手參與“THE PAPARAZZI CANTOPOP PARTY”活動，於西九文化區藝術公園海濱東草坪開唱，力撐廣東歌。

邱傲然(Tiger)為這晚活動表演打頭陣，一口氣唱出《脫兔》等三首歌曲，令現場氣氛頓時升溫。即使現場下着細雨，歌迷亦照樣為偶像吶喊助威，寵粉的邱傲然亦冒着雨走近粉絲，還逐一同大家擊掌，並與粉絲說：“多謝你哋落雨都嚟呢個Event，畀啲掌聲自己。”

其後王偉俊(TELLER)緊隨其後登場，他為這晚表演重新編曲，仲不時表演拿手Beatbox，還把握機會大冧粉絲：“今日啲歌全部都係Special Version，因為你哋全部都係Special嘅每一位！呢度（維港景）真係好靚，但都唔夠一個紫海（粉絲燈牌）靚，Love You All。”

《聲秀》代表周智敏、穎喬及柯雨霏勁歌熱舞出場，粉絲歡呼聲不絕。周智敏(Emily)短裙上陣，翻唱容祖兒金曲《隆重登場》，不時跳出火辣舞步令全場氣氛升溫。穎喬(Ziva)亦都非常性感，高衩露腰裝束非常養眼，型格戴太陽眼鏡跳舞：“大家So Far睇得開唔開心？我今日又係跳《Taxi》，我跳到好熱，見到你哋着晒雨褸都嚟支持我哋，真係好多謝你哋，大家要保暖唔好凍親，近排好多人病，你哋一定要保暖。”柯雨霏(Ophelia)則小背心上陣，非常青春可人，她非常心疼粉絲淋雨支持自己，所以非常識做走近粉絲收花。

壓軸出場的張馳豪，大騷手臂肌肉盡顯大隻線條：“嚟到先知道原來四面台，所以冇排過都係執生。多謝大家今日咁嘅天氣都嚟聽我哋唱歌，希望大家玩得開心。希望大家包容呢個有鬚嘅造型，因為我依家拍緊劇《警是個大佬》，唔知今年出定係出年播，希望盡快出街畀大家睇。”最後張馳豪跳落台同大家握手，仲好識搞氣氛叫全場拍手和唱，為這晚的節目劃上完美的句號。