張柏芝曾比特任嘉賓

鍾嘉欣佛山搞生日限定騷

鍾嘉欣(Linda)前晚假嶺南明珠體育館，舉行《Remember記得 · 鍾嘉欣演唱會》佛山站生日限定場。鍾嘉欣並非首次在佛山開騷，但反應依然熱爆，全場座無虛席；作為生日限定場，除了特別設置延伸舞台與觀眾近距離互動外，更驚喜邀請了張柏芝與曾比特擔任嘉賓。

Linda透露今次作為二○二六年演唱會頭炮，揀選佛山舉行，源於她喜歡這地方：“上年第一次開演唱喺佛山，好好反應，所以今年都揀呢個地方作為起點。今次呢個場館有七千人，第一次挑戰咁多觀眾，事前已好期待。加上佛山呢個地方好有人情味、生活節奏又舒服，仲有好多美食，雙皮奶真係好好食。”

為了帶給佛山觀眾驚喜，鍾嘉欣在服裝上煥然一新，歌單亦新增六首新歌，還特別加插一節勁歌熱舞發放正能量。不過論到全晚最意想不到的，莫過於獲兩位重量級嘉賓張柏芝與曾比特登場，鍾嘉欣表示：“兩位嘉賓都係我非常想合作嘅人。曾比特，我喺社交平台睇過佢演出，佢把聲好靚，好欣賞佢，我好好奇佢把攣髮係咪真，一見到佢就想親手摸吓；而柏芝，我二○一三年喺香港開演唱會已經邀請佢做嘉賓，不過嗰時佢檔期唔得，我一直都想再邀請佢，今年再嘗試搵佢，佢真係好Sweet，一口就答應，仲話只要佢個期得，啲工作調前調後，佢都會100%支持，我聽到佢咁講，覺得好感動同窩心。”

提到柏芝，鍾嘉欣表示入行初時透過朋友認識對方，柏芝是她心中一位大姐姐，好有愛、好願意幫人。鍾嘉欣與柏芝在演唱會上合唱《目的地》和《任何天氣》兩首歌曲，嘉欣指：“《任何天氣》係我有私心，我希望柏芝可以唱呢首歌畀我聽，因為呢首歌內裡歌詞好有正能量。”而鍾嘉欣與曾比特則合唱黎明金曲《夏日傾情》，她還笑言跟曾比特合唱，有種找回初戀感覺。