蕭正楠夫妻檔搵奶粉錢

蕭正楠（阿蕭）與黃翠如一向是圈中的恩愛夫妻，自從去年三月誕下兒子“蕭哈哈”後，常常在社交平台分享三口子家庭生活照，令人艷羨非常。

日前阿蕭及翠如為健康食品品牌拍攝全新廣告，分享了不少為人父母後的改變。兩夫妻在拍攝過程中乘機放閃，真情流露甜蜜互動。今次夫妻檔合體搵奶粉錢，翠如透露過程很有趣：“客戶放手畀我哋用返自己嘅默契去演繹，所以大家睇條片其實好多都係一Shot落，過程好好玩，因為我哋而家身份轉換咗，好多時候習慣咗做爸爸媽媽，今次可以喺片裡面得返我哋兩個，算係一次小拍拖。”阿蕭亦不禁回想起兩人當初在劇集《師奶MADAM》初邂逅的情景：“就算我哋電視劇冇再合作，喺廣告再合作都非常之開心。”

上月才剛滿一歲的蕭哈哈，已十分有Camera Face，被問會否考慮跟兒子一齊拍廣告，翠如坦言：“暫時未諗住畀小朋友接觸呢個行業，因為其實BB參與拍攝好辛苦，畢竟拍攝環境沙塵滾滾，亦有好多唔同聲音，對BB嚟講唔多習慣。”阿蕭就大爆兒子有唱歌天分：“我發現佢遺傳咗我嘅，就係佢好鍾意唱歌，可能當時佢喺媽媽肚入面經常聽我唱歌，所以潛移默化。”