李晞彤首演音樂劇壓力爆煲

女團VIVA隊長李晞彤(Carina)日前順利完成經典K歌獨唱戲《Nancy戀噏Show》首兩場演出，亦是對李晞彤的一次大考驗。這不僅是她首次挑戰音樂舞台劇，更是完全沒有演出電影及電視劇經驗的她人生第一次演戲；李晞彤在劇中更需要一個人唱接近二十首廣東流行歌，及熟讀超過三十頁台詞，對首次接觸這類型表演的她來說絕對是“硬仗”。

首兩場終於順利完成，李晞彤完騷後即在後台蹲下來爆喊，除了喊到收唔到聲，更邊喊邊說：“我都係鍾意同VIVA一齊做嘢！我唔想Solo喇！”壓力大得可想而知。

事後李晞彤坦言：“好難，真係好大壓力，演完第一場感受到舞台係個試煉場，拍嘢有NG有後製有同伴，但今次唔係女團，係獨腳戲，我只有我自己。行上台之前就要清楚，無論我有冇甩台詞、換唔換得切衫、把聲頂唔頂到，任何擔憂都冇用，因為The show must go on。但亦都因為今次唔係女團，我唔需要嘗試做一個完美嘅女仔，所有嘢都係執生，所以不如好好享受所有未知性帶嚟獨一無二嘅每一場。頭場真係好緊張，去到最後係好難過，因為覺得尾段嘅Energy唔啱，唔應該係咁！所以就踎咗喺度爆喊，好似將所有嘢release晒出嚟。”