Twins派奶茶場面墟冚

為慶祝“英皇娛樂25+ HAPPY BIRTHDAY慶典”，繼經理人霍汶希(Mani)率領張敬軒和李幸倪快閃快餐連鎖店任“奶茶大使”後，日前輪到Twins接力出動落區派奶茶，再加上是Twins出道廿五周年，實行將歡樂及奶茶一齊散播全城。

活動下午一時開始，但粉絲早上九時已在餐廳內坐定定等候，餐廳方面亦貼心地劃了一個區域舉行這次活動，範圍可容納近百粉絲，場面猶如等開騷般墟冚。

當蔡卓妍（阿Sa）及鍾欣潼（阿嬌）甫現身，全場即刻陷入瘋狂狀態，歡呼聲拆天，二人隨即發揮親民本色，繞場一周派奶茶。除了派奶茶，Twins更十分有心思，特別準備了親自設計，印有“TWINS”Graffiti圖案的Tote Bag及小卡送給粉絲。二人默契十足，一個負責派奶茶，另一個派Tote Bag，讓粉絲有得飲又有得拎，滿載而歸，最後更來個全場大合照。

活動後阿Sa忍不住謂：“好耐都冇同粉絲有咁近距離接觸，上一次Fans Meeting都算近，但今次真係面對面咁，好難得。”阿嬌亦笑說見到大家的熱情，自己都派到唔捨得走。整個活動由頭熱鬧到尾，不少粉絲都說Twins又派又送勁有愛。