連續三年開英文歌騷

區瑞強教占士丁丁擘腿

區瑞強(Albert)、吳大強(Bill)與占士丁丁(Dan James)昨日舉行記者會，公佈將於二○二六年一月十六及十七日，假理工大學賽馬會綜藝館舉行《區瑞強三生有幸英文經典演唱會2026》，屆時三人將演繹多首英文經典金曲。

Albert已連續第三年舉行全英文歌演唱會，他表示英文歌在香港音樂歷史早已存在，希望能夠推廣這個傳統。他說：“以前未有廣東歌嘅時候，大家都係聽英文歌長大，但呢幾十年唱英文歌嘅人愈來愈少，聽英文歌方法同機會亦都愈嚟愈少，喺現場演繹就更加難。我自己就唱咗幾十年英文歌，我做電台時亦發覺好多人仍然鍾意聽啲經典嘅英文歌，仲係啲七、八十年代嘅經典英文歌。呢個已經係我連續第三年全部唱英文歌嘅演唱會，之前兩次都非常受歡迎。”記者會上Albert跟吳大強和占士丁丁即席獻唱《Devoted to you》，合照時Albert見占士丁丁高了一截，即場教他擘腿的廣東話，順便遷就大家的高度，丁丁一學就識，場面搞笑。

講到邀請吳大強和占士丁丁合作，Albert首先多得《中年好聲音》發掘這兩位好歌手，又認為他們已非小朋友，唱經典英文歌的感情運用會更佳，“講真，唔係每個識英文嘅歌手都可以唱到英文歌，係要唱英文歌成長嘅人，所以《中年好聲音》呢兩位真係絕無僅有，今次好開心邀請到佢哋合作，享受我哋一齊成長嘅英文歌。”

吳大強跟Albert將第六度合作，對於再合作感覺很興奮。他說：“好多謝Albert邀請，每次跟Albert合作都會畀到好多啟發我，而我哋大家都好鍾意唱英文歌，所以合作得特別愉快。”

首度跟Albert合作的占士丁丁，得知將與前輩參加演出相當好開心，“Albert哥係殿堂級歌手，佢搵我一齊開騷係一個肯定，好多謝佢畀呢次機會我。參加《中年好聲音3》都係Uncle Bill鼓勵我，而Albert哥《中年好聲音3》都係現場做DJ，同佢哋合作一定可以學到好多嘢，所以真係好開心。”