何家勁求健康作息定時

何家勁昨日出席香港戶外用品及運動博覽二○二五開幕典禮暨亞洲室內運動節啟動禮，他的勁家莊健康食品亦於現場設有攤位。何家勁表示今次是專程回港出席活動，推介其健康食品，希望可以令大家保持年輕和開心。不過他強調服用健康產品，也得靠運動去配合，他就經常去慢跑，亦不會做太劇烈運動。

在惠州經營勁家莊健康食品生意的何家勁，一做已十五年：“當時我拍拍吓戲想轉行，就諗有咩好做，覺得健康人人都重視，於是同拍檔傾搞健康食品，一傾就一發不可收拾做咗十幾年。”除經營生意以外，仲有冇戲癮想出山拍戲？何家勁說：“其實都有人搵我客串，但拍完一、兩日，都唔知做咗啲咩，太重戲我又冇時間，睇吓劇本係咪夠吸引，我曾經都講過，我只會再拍《中華英雄》，因為冇年齡限制，整個白色假髪，補少少妝，唔好咁特寫，都夠殺啦。”記者即讚他保養得好拍大特寫冇有怕，他笑說：“唔好自欺欺人，年齡不斷增長，健康會一路失去，我都唔係要長生不老，但希望健康到老。”何家勁指現作息定時，每朝六時起床、晚上十時就寢，以前拍戲熬夜實在太傷身了，所以現在朋友夜晚叫他去玩，都一一謝絕。