戲裏戲外真邦哥

辛康納利，唔識佢好打有限。由佢開頭，七部〇〇七鐵金剛片，直頭占士邦化身。隨後雖幾代邦哥，辛伯依然係一哥。其實佢討厭拍邦片，當年首部《鐵金剛勇破神秘島》，作者弗萊明嫌佢低俗邋遢：“唔係我要嗰隻。”

然上畫後竟然大賣，辛伯大受歡迎，弗叔唔制又制，隨後連拍七部，致令全世界影迷認為，辛伯至係正牌占士邦。辛伯亦睇錢份上，跪地餵豬乸，暫且屈就。

辛伯出身寒微，母係邋遢婆，父係揸車佬，佢亦自小從百業。然天生我材，體型魁梧，成個希臘神話俊俏神樣，做藝術學院男模極受歡迎，因之被薦入戲行。

辛伯當年與女星蓮娜端納拍拖，畀蓮姐前黑幫男友興師問罪。辛伯一人敵四手，殺個片甲不留；黑友索性到片場拔槍篤鼻，辛伯空手奪槍，出奇制勝，果然占士邦本色，絕非花拳繡腿。

辛伯唔屬靚仔，然性感，被封“最性感男星”。息影後腦退化，五年前今日，夢中去世，齡九十。

西門公子