港鐵新廣告《尋·未來記》

林峯化身霸氣“寡人”穿梭時空

日前流出的林峯《尋秦記》片段，引起網民競猜所為何事，原來係林峯以“寡人”造型拍攝港鐵新一輯新鐵路廣告《尋 · 未來記》。今次係林峯時隔二十四年再以霸氣“寡人”現身幕前，於片中沿港鐵各大重點項目穿梭現在與未來，預告片連同一連兩集正片接力推出。

除咗經典劇集《尋秦記》“寡人”外，仲有《溏心風暴》經典CP拍檔鍾嘉欣以“常在心”造型登場，必然引起劇迷回憶。另外，港鐵今次更大玩港人集體回憶，召喚已經長大成人變成大隻仔嘅“打波先嚟落雨的四眼仔”鄭仲軒(Eric)聯同林峯合演經典橋段，重現當年情人節喺花墟一人買兩紥花嘅“花先生”，將集體回憶以創意延續，同時融入廣告橋段當中，再創新經典。

林峯話今次飾演寡人穿越時空，令佢重溫昔日搭港鐵返學的情懷，佢亦笑稱對古洞並不陌生，因為該地方屬古裝拍攝勝地。林峯又說：“當年我拍《溏心一》時本來諗住淨係客串，同埋未試過一個角色淨係負責拍拖，果陣日日都係同嘉欣一齊開工，點知拍拍下越嚟越多場口！但其實都好開心嘅，因為可以創造咗令觀眾記得嘅角色。”

呢次港鐵一手撮合林峯同鍾嘉欣以經典CP組合同場出現，兩位都覺得好神奇、好感動！久未與林峯合作拍劇嘅鍾嘉欣，一見到管家佬嘅經典格仔恤，昔日回憶即時湧上心頭：“嗰陣嘅《溏心》系列對我哋嚟講，事業上真係幫咗好多。所以到依家廿年後，都仲可以走返埋一齊，拍返一個好似續集咁樣嘅廣告，感覺都好奇妙。”嘉欣仲話平時搭港鐵，如果有化妝會大方示人，素顏時就“頭耷耷”冇人認得出：“我平時都會帶小朋友坐港鐵，因為呢個係香港嘅特色！同埋我會話畀佢地知，媽咪係靠坐車學講廣東話，好似‘將軍澳、旺角’，可以睇到好多中文字，又試吓擺啲銀仔買飛等等！”