與RubberBand年底開騷

側田被讚音樂狂人

側田、RubberBand宣佈齊齊開騷，將於十二月十三日在西九文化區AXA x Wonderland舉行音樂會。RubberBand、側田為同期出道，6號對呢次“合體”非常期待：“我哋識於微時啦，以前又係同公司，好似重回入行的時候，有興奮嘅心情！因為有兩個單位嘅火花，同自己做騷好大分別。”

側田表示呢次“合體”機會難得，希望撞出新火花給樂迷驚喜：“其實真係要多謝主辦單位嘅牽線，我同RubberBand識咗好耐，以前都係同公司，但一齊開show真係未試過，所以今次有機會合作，真係好難得。我好珍惜呢次機會，希望同佢哋撞出啲新火花，帶到畀觀眾一個驚喜。”佢表示Cross Over感覺新鮮，預期觀眾應該鍾意呢次演唱會：“我其實鍾意佢哋好多歌！我都想唱多啲勵志嘅歌，帶多少少Gospel風格。我哋將會融合成一隊band，等於呢隊band多了一個主唱及和聲。”

長居海外嘅側田又表示，會返香港練歌，務求最佳狀態演出：“彩排我一定會返香港！現場一齊夾先至最有火花，所以點都會返嚟一齊練。其實我哋都係Mark Lui帶入行，音樂路上行嘅方向都好相似，加上都試過同公司，所以感覺上會特別夾。”

6號@RubberBand形容側田“音樂狂人”，欣賞他對音樂夠“堅持”：“他的唱歌技巧、感情是很高階，他的流行Hit歌是當時的回憶，轉眼就二十年，回憶殺相信是今次個唱其中一部分。我最想唱他的《Erica》一曲，二十年前第一次以RubberBand身份，改篇呢首歌與側田合唱，所以好想圓夢再唱多次。”

6號又說：“十年前我們同公司，有不少機會同台演出，當時我們入世未深只顧自己部分，希望今次將側田融入成為一隊大編制的樂隊，大家可以隨時轉位表演，呢個就是好玩之處。”