黃智雯婚後拍廣告大露背

黃智雯(Mandy)日前為代言美容品牌性感上陣拍攝廣告，露背之餘亦有低胸露腿，大騷完美體態。Mandy笑言今次拍攝是她婚後首次“大解放”，為了以最佳狀態示人，事前做足準備，更要老公陪她“清潔飲食”，實行整整一個月冇飽飯食。早前完成舞台劇《薄伽梵歌》後，瞬即又要為代言美容品牌拍攝廣告，Mandy直言演舞台劇壓力很大，徹夜難眠。為拍廣告，她首要準備是調整身心：“做舞台劇都瘦咗七八磅，完咗舞台劇後，知道要拍廣告，即刻調整身心，瞓番多啲，因為演舞台劇壓力好大，有啲失眠。”

今次廣告Mandy以兩個性感造型登場，是已為人妻的她首次“大解放”，她說：“剛才拍攝，有幾個鏡頭令我諗起影婚紗相，因為白色裙又有紗，好有着婚紗嘅感覺。今次冇特別同老公講有幾性感，不嬲佢都唔會過問我嘅工作，最緊要性感得嚟健康；佢淨係知我要演舞台劇同拍廣告，知我要Keep Fit，所以陪我一齊進行清潔飲食，食得健康啲，食蛋、食雞胸，不過佢就冇瘦到，因為佢夜晚會去偷食零食。”提到性感上陣，Mandy直言最滿意自己個背脊，她自豪表示：“個個人見過我背脊都話靚，冇暗瘡喎。其實我每星期都有做磨砂，好好護理背脊，自己比較喜歡骨感。”