《媽的又要嫁》開鏡

伍詠薇對戲中老公手多多

陳山聰、梁競徽（唯唯）與林盛斌（阿Bob）三位好兄弟聯同伍詠薇，日前到馬來西亞拍攝賀歲電影《媽的又要嫁》。為了幫電影業界出一分力，山聰捐出片酬當投資，而首次身兼電影編劇的唯唯更要賣樓當製作費，自言如果今次唔掂就要瞓街。

《媽的又要嫁》日前於吉隆坡舉行開鏡拜神儀式，一班主要演員跟製作團隊齊齊祈求電影開拍順利及大收旺場。在戲中伍詠薇飾演山聰與阿Bob的媽媽，而唯唯則飾演兩兄弟之好友。伍姑娘自言本身好接受做阿媽角色，但當知道兩個仔係山聰同阿Bob時感到錯愕，幸好導演安排一位三十一歲馬來西亞靚仔演員馮瑋佺(Daniel)做她老公，伍姑娘立刻開心晒，更對身旁的Daniel手多多，搞到Daniel害羞不已。”山聰覺得戲中做伍姑娘兒子好合理，因為大家都屬於靚仔靚女，但就不明何解有阿Bob這個細佬，阿Bob立即反擊：“你地靠様，我靠內心戲發揮。”引得全場爆笑。

山聰今次捐出片酬拍戲，他說：“當係小小心意，為電影圈盡一點棉力。因為同唯唯、Bob好好朋友，好多人都話影圈係冰河期，我哋一直都好希望拍套能帶畀觀眾開開心心又溫情嘅賀歲片，今年終於搵到幾個投資者。而唯唯首次做編劇，佢絕對有能力，又好多謝契姐伍姑娘，知道我地製作費唔多，肯以友情價仗義幫忙，因為我哋太熟啦，大家預咗一埋位就鬥爆肚。”至於賣樓用作製作費的唯唯則表示，希望在影圈冰河期，香港演員能跟馬來西亞演員一齊努力，拍到一部令觀眾睇得開心，又能帶出珍惜家人之訊息的電影給觀眾。唯唯說：“當然希望套戲都收得，唔係就真係要瞓街。”