林峯憶內地拍劇曾限熱水沖涼

林峯昨日出席茶品牌活動，與一眾粉絲在台上互動大玩遊戲。受訪時，提到最近的工作安排，他表示：“九月會開始巡迴演唱會，去到唔同嘅城市歌單都會有啲分別，想畀啲驚喜大家。”

講到早前點名多謝古天樂提攜轉戰電影圈發展，他表示：“嗰陣時離開咗電視台，我第一時間係搵咗古天樂先，佢嗰陣時都已經叫我多啲拍電影，不過嗰個階段都仲想做歌手，好多謝古天樂畀咗個機會我去行演員呢條路。”

至於是否因為當年與宣萱和古天樂合作拍《尋秦記》而熟絡，他說：“尤其係去內地拍戲，大家真係同甘共苦，嗰陣時啲影城都未完全開發，好少劇組去拍戲，所以好多條件都比較唔充足。我記得嗰陣時我哋住喺蒙古包，熱水限時淨係兩個鐘，煲水唔夠五個人沖涼，如果遲少少沖涼都係得凍水。”他指通常都會讓女演員先用熱水沖涼。

被問到《九龍城寨 · 終章》何時開拍，他表示：“最新收到嘅消息係一月份要開始訓練，訓練嘅時間係多過上次一倍，所以呢幾個月做足準備功夫，希望將身體狀態調整到更好。”