蔣怡拍飲食節目變奶媽

有美女廚神之稱的蔣怡(Coco)，近日擔任HOY全新飲食競技節目《領廚爭霸戰》的主持。Coco在接受HOY主播俞詠文專訪時透露感覺好新鮮：“雖然之前都有做過美食節目嘅主持，但係比賽形式就係第一次，我好鍾意做呀！因為本身都好鍾意食嘢，又鍾意睇人煮嘢，亦好鍾意批評下人哋煮嘅嘢，所以呢個職位對於我嚟講係一啲都唔辛苦。”

但說到其中有一場明星賽，Coco就直言非常辛苦：“當日我唔止係評判同埋主持，簡直係一個奶媽！因為佢哋真係太唔識煮餸，本身已經冇乜期望，但冇諗過咁混亂，當然喺娛樂性方面係攞一百分。其中有一啲真係行嚟行去冇做過嘢，仲搞搞震，好似一蚊Joe就係其中一個。佢同啲美女將啲食物掟嚟掟去，我就即刻Stop佢哋，我話食物唔可以用嚟當玩具。而身為評判嘅Jacky同Ricky仲衰，畀啲美女迷惑，嗲到佢哋連比賽Over Time都唔理，你話係咪激死我呀。”