張頴康讚老婆：唔會畀綠帽我戴

藝人張頴康與太太麥雅緻(Angie)日前到新城廣播，接受李有毅(Ben)和兒子李國煒(Benson)主持的《Ben同Benson“chur”到行》錄音訪問。阿頴和Angie是圈中的模範夫妻，二人在節目中分享相識經過，又大談夫妻相處之道，溫馨又甜蜜。

阿康和Angie於二○一二年結婚，先後誕下大女“小豆”張雅喬、二子“小花生”張迅橋和孻仔“小蛋黃”Maka，一家五口樂也融融。

問到夫妻倆最欣賞對方甚麼，阿康表示：“最欣賞佢冇放棄過我，其實好易放棄，我又係難頂，佢都唔放棄係好難發生。”Angie則最欣賞阿康專一及愛自己，她說：“佢一直表現得好愛我，由啱啱拍拖到生咗三個小朋友，喺生活上佢都好細微，出門口會叮囑我小心啲，過馬路睇車，好細心嘅表現。”

阿康曾經大讚太太是絕世好老婆，他透露拍拖一個月已經要娶Angie做老婆，“佢嗰個令你安心嘅程度，係唔會令到你傷心，唔會畀綠帽我戴，呢個好緊要，佢唔會有異心，會好忠誠對你呢個人，發生任何時都會企喺你嗰邊。”