曾傲棐首度港鐵站內獻唱

歌手曾傲棐(Arvin)日前出席“港鐵藝術舞台”夏日音樂會，一連唱出四首歌曲，吸引數百樂迷駐足欣賞，場面墟冚。Arvin不時向粉絲派心心，認真識做。

Arvin自爆是鐵路迷，這次於港鐵站內表演大呼感受特別，“我住元朗，以前東鐵未有得過海嘅時候，每次過港島就係喺呢度行，去到嗰邊搭車，所以第一次喺呢度唱歌畀大家聽係好特別。”

日內即將推出新歌派台的Arvin，原本打算透露歌名以慰藉粉絲，點知原來早已洩漏，唯有向MV“埋手”。他說：“MV好睇嘅，因為今次MV我參與得比較少，所以係好睇嘅。係關於一啲集體回憶嘅嘢，希望大家睇完之後會有共鳴。”

除此之外，下星期亦是DSE放榜的日子，Arvin以過來人身份為應屆考生打氣：“當年DSE分心Busking和打波，成績未達預期亦意料之內，但其實成績不是一切，最重要是找到發光發熱的地方。當年我都覺得證書很重要，但現在回看又好似不是，路都是由自己行出來。其實擔心都沒有用，善用時間做自己喜歡的事。”