女神配對睇中姜卓文

關嘉敏：佢唔揀我好傷心

關嘉敏(Carmen)日前現身新城廣播接受《開心大派對》節目訪問，節目一開始，即被兩位主持薛家燕及思敏好奇追問連串關於她參與TVB《女神配對計劃》戀愛綜藝真人騷的問題，非常搞笑。家燕姐劈頭即八卦直問Carmen當初參加時，會否諗“係咪嚟真？”、“真係鍾意咗咁會點？”Carmen直言：“算是內部公開招募，當時正在拍攝一個樓宇短劇，監製導演知道我沒有男朋友，問有冇興趣參加，我話都好喎！其實我已有三年沒有拍拖。如果在節目中找到男朋友就當係Bonus，講真，邊有咁易搵到男友呀！拍個節目就鍾意上對方？當時，純粹覺得想玩下，認識不同的男性朋友。”

家燕姐直問依家揀到意中人未，Carmen隨即露出甜絲絲笑容，豪爽直答：“其實我好主動地揀咗姜大衛個仔細John（姜卓文），哈哈！”家燕姐聽到姜卓文名字，即時開心到大叫並大讚：“佢係我世姪嚟㗎！我同佢嗲哋、媽咪好熟㗎，佢好乖仔，唔錯！”Carmen聽到後反應超興奮，更不顧儀態驚喜尖叫：“家燕姐世姪！我好鍾意佢㗎！細John未入圍時，已經睇中他，但當時他卻揀了Stephanie(李芷晴)，我好傷心呀！好唔開心！”