新季F1澳洲揭幕

四大車隊爭崩頭

車迷苦等近三個月，新一季F1又返嚟。相隔六年，今年將回歸澳洲上演揭幕戰，全季繼續有廿四個分站。紅牛經歷二三年以橫掃姿態盡破紀錄後，上季僅憑承接前季餘威在季初建立優勢，但差距已被對手大幅收窄，下半季更被麥拿倫超越，法拉利及平治亦趕上，四大車隊輪流上頒獎台百花齊放，炮製近年罕見的精彩激鬥。

今季作為大改例前的最後一年，幾乎所有車隊都不會“輕舉妄動”，將資源留至下季的戰車研發，預計會延續上季的精彩，上季擊敗紅牛相隔廿六年重奪車隊冠軍的麥拿倫已被視為大熱，羅里斯與派斯迪有機爭車手冠軍；紅牛優勢不再，華斯達賓要爭五連霸將困難重重；七屆冠軍咸美頓改投法拉利，話題十足成為焦點之一；還有平治由羅素領軍搞局，四大車隊實力非常接近，將鬥過你死我活；除最弱的沙巴外，中游由五支車隊鬥餐飽一樣好睇。今季將是近年競爭最激烈的一季，必定精彩。