脫衣港姐留其名

鄭文雅，於今無人識矣。然叔父聞之，當堂彈起：“我識！演過乜戲唔記得矣，唯記得佢拍過寫真！”叔父認真老實。“古來聖賢皆寂寞，唯有飲者留其名”，真箇要改為“唯有祼者留其名”矣！

雅姐青葱出道，真如叔父所言，拍過乜片，真無記憶。當年鄭大班經翰公創辦剝衫公子雜誌，以雅姐封面招徠，兼出版雅姐祼體寫真集。嘩，這還得了！靚女隨街有，唯以港姐金嬌玉貴之身，係人都想睇真真。

雅姐驚世之舉，前無古人，褒貶兩極。麻甩佬固然大讚好戲，慧妍一派則喜怒参半。喜者，哈，將來又多條財路；怒者，要我等名門淑女鳳凰變山雞！然喜歸喜，怒歸怒，寫真集炒至渴市，鄭大班袋袋平安。

西門師傅有名言曰：“好嘢唔好收埋，要畀人睇。”天生麗質，上帝傑作，人生冇幾年風光，青春何能常駐？今日唔騷，更待何時？雅姐膽色，令人佩服！

雅姐今日六十五歲牛一。

西門公子