蛇年謝票逼爆戲院

馬國明：好有滿足感

王晶與葉念琛爆笑領軍賀歲片《麻雀女王追男仔》現正熱映中，票房約收三百萬，導演葉念琛與男、女主角馬國明（馬明）、高海寧（高Ling）日前蛇年首度現身，出席一連幾場戲院謝票，場面墟冚。三位更相當“寵粉”，於戲院大堂跟粉絲觀眾逐一合照，以致人龍逼爆戲院，令現場水泄不通。

對於觀眾反應熱烈，三位大表興奮，並感謝一眾支持者捧場。導演葉念琛說：“好開心，觀眾反應好好，佢哋好唔捨得我哋走，希望反應好啲，我哋繼續謝票。”高Ling笑指觀眾好熱情，可以多謝票，多互動。至於男主角馬明則指：“最開心係見到佢哋（觀眾）睇得好開心，睇完戲又好開心，感受到電影喺新年帶到歡樂畀大家，所以好有滿足感！”

高Ling當日早上從美國工作返港，甫落機即加入謝票相當有心。而導演葉念琛當日更提早到戲院，視察觀眾反應，他透露：“大家睇到笑位好開心，至於感動位又感動到大家，賀歲片最緊要將歡樂同感動帶畀觀眾！”而導演及兩位演員更袋住一些超高難度的麻將問題，即席考驗觀眾。導演笑言：“佢哋都答到呀，好犀利，其實我都答唔到。”高Ling及馬明更呼籲觀眾繼續入場支持，馬明更預告：“希望再揀多啲場次嚟謝票！”

談到蛇年新年願望，三人一條心都是從電影出發，導演葉念琛說：“希望更多人入場支持《麻雀女王追男仔》”高Ling則表示：“+1，希望票大賣！”而馬明則簡單直接說：“票房越高越好！”