音樂會下月中旬饗樂迷

華納三寶同台成焦點

華納唱片動員十二個歌手樂隊單位參與《Katch Our Life WARNER! GO!》，將於二月十五日舉行。Dear Jane、陳蕾、洪嘉豪、張天賦(MC)、湯令山(Gareth.T)、張蔓姿(Gigi)、KiriT、Moon Tang、Zpecial、Lewsz、歸綽嶢(Nancy Kwai)、Gordon Flanders等施展渾身解數，勢要炸裂亞博舞台！華納三寶同台網上呼聲最高，令人期待。

雖然音樂會下月中才舉行，但期間橫跨農曆新年，眾人“度期”彩排甚有難度。洪嘉豪笑言新春期間將聯同華納仝人“洗劫”Dear Jane主音Tim及低音結他Jackal，因為已婚同事不多，剛巧Jackal哥新婚，要讓他感受派利市的喜悅。

陳蕾表示想“閉關”，練歌之餘亦為來年搵靈感。過去一年實在好忙，沒有時間靜下來，希望可以安心在家寫歌找數，又可以想一想未來方向。這個音樂會有好多Medley要唱，記極多歌詞之餘，還要記好多舞台走位，難度隨時高過自己個唱。

張天賦就話為咗呢個騷唔敢鬆懈，揚言戒油過農曆新年：“因為平時過年好多油炸嘢食，但係呢個騷同新年太近，我怕食太多會影響聲帶，所以今年就‘清清哋’過年。（呢次騷最特別邊部分？）聽聞所有女歌手都會跳舞，Dear Jane同Zpecial仲會聯乘（三寶同台？）大家可以幻想，到時咪知囉。”

Dear Jane主音Tim就話同班兄弟“日日見”，過年期間想“抖一抖”，可以陪吓老婆同仔女。今次呢個騷有好多新“組合”出現，到底邊個會夾邊個都仲未知，不過Dear Jane夾誰都得，到時有音樂自然好High！