入行四十周年演唱會

陳慧嫻甩褲要克勤幫手

陳慧嫻四十周年演唱會剛完成第三場演出，邀請了好朋友李克勤任嘉賓，慧嫻台上跳到甩褲，叫克勤幫手搞，又吩咐克勤唔好那麼辛苦為兒子賺錢，等他們白手興家。休息一日之後，慧嫻再返紅館舞台演出第三場，依舊狀態大勇，氣氛比前兩晚更熱烈，整晚都全場大合唱歌聲震館，令她十分開心。

不知是否觀眾反應熱烈，慧嫻亦被帶動忘我，跳舞環節興奮跳到甩褲，當她與克勤完成《跳舞街》之後，立即大叫：“克勤呀！我唔知係咪瘦咗呀……我條褲甩咗落嚟，我入面個條打底褲呀……你幫我搞搞得唔得……”李克勤就尷尷尬尬笑住話：“我有家室㗎啦喎....”慧嫻答他:“唔緊要啦，當睇唔到啦今晚……”克勤竟拒絕：“搵個女dancer過嚟啦，過年流流……”引得觀眾大笑。

兩個由二十歲就相識的好朋友，從寶麗金年代已經同一間唱片公司，兜兜轉轉又再於新公司英皇娛樂做回同事，慧嫻表示：“佢係李克勤！佢值得啟德個館咁大掌聲呀！”克勤笑道：“咁客氣呀，識咗幾十年。”慧嫻接着說：“ 就係識咗幾十年，我哋好少喺台講真心話，通常真心話都係我哋喺電話講，佢真係一個天才嚟㗎！我做咩都問佢意見，今次演唱會佢都特登第一場就嚟睇，又畀咗好多意見我，好多我諗唔到嘅嘢，佢都諗到。咁多年，我做咩節目，接咩工作，佢都畀好多意見我，我咩都問佢，不過近半年我見你不停咁巡迴演出，飛去呢度飛去個度，我都唔敢打咁多電話畀你，有時見到都覺得有啲心痛，做咩咁辛苦啊？”

之後，克勤回話：“嘩，我有少少眼眨淚光添，我家庭負擔重嘛。”慧嫻就訓話：“你唔好咁辛苦！等佢哋好似你咁白手興家！自己賺錢！”觀眾即掌聲雷動。克勤獨唱時，說為了這個好朋友，第一晚刻意就來捧場：“我都未試過做人嘉賓要跳舞嘅，誠意十足㗎啦，睇咗一次先，有定心理準備。今晚揀左一首慧嫻冇在演唱會揀嘅歌畀大家，如果大家鐘意，一陣熱烈啲一齊唱。”接着唱出慧嫻的經典名曲 《去吧》，令觀眾聽出耳油。