莫鎮賢積極為個唱彩排

莫鎮賢昨日聯同表演嘉賓何婉盈、文佩玲、李樂詩及“中一生”李泇霖，為本周三（四日）開唱的《唱好女神》演唱會二○二四進行彩排。

相隔三年再度開唱的莫鎮賢透露心情既興奮又緊張：“三年冇開騷點都有啲緊張，台燈聲、服裝、歌單，每樣嘢我都親力親為，除咗演唱會仲要兼顧其他工作，呢排都好繁忙。不過忙得嚟又好興奮，今次可以同四位女神一齊唱經典歌，我哋仲特登安排咗跳舞部份，早兩日先練完舞，個個都跳得好好。”

早前因不在香港未有現身記招的文佩玲，笑言錯過大日子：“上次有事在身，趕唔切返嚟，我事後睇返啲相，好開心呀。我同莫鎮賢識咗好耐，今次佢搵埋我唱，玩得好開心，有咩事大家都有商有量，合作得好舒服。”何婉盈最期待跳舞部分，笑言：“我哋今次要跳老舞，所以特登夾晒相同顏色嘅歌衫，到時要做女團跳唱畀大家睇！”問到四位女神當中誰最跳得？莫鎮賢封李樂詩做舞后：“佢平時都好鍾意跳舞，又跳得好睇。”

身為後輩的李泇霖表示：“莫老師教咗我好多唱歌技巧，位位女神都咁有氣質，雖然佢哋都係前輩，但真係好nice，喺佢哋身上學到好多嘢。”