歐倩怡復出訪問惹負評

回復單身後的歐倩怡(Cindy)近期頻頻曝光，除為HoyTV皇牌節目《健康關注組》擔任多集嘉賓外，更接受HoyTV主持俞詠文(Angela)訪問，傾談心底話。

Cindy超過二十年沒有擔任幕前工作，坦言“復出”後有不小壓力：“好多人同我講，而家嘅娛樂圈同我二十幾歲時嘅娛樂圈，分別已經好大。以前我做宣傳嘅時候，係得我一個單向面對傳媒，但而家多咗好多網上嘅媒體，只要有人留言，就會引申好多唔同嘅話題。其實你睇返我二十幾年前嘅訪問，我都係一個好多嘢講，嗶喱巴啦嘅人！大家冇見我咁多年，可能同大家預期嘅唔同，覺得我好似冇長大過，其實我不嬲都係咁。”

談到回娛樂圈後，在網上平台的言論，惹來不少負評，Cindy表示極度不開心：“我完全冇諗過訪問出街之後，會惹來咁多負評，大家冇見咗我咁多年，唔知我身體出現過咩問題，我經歷過啲乜嘢，我只係純粹分享，冇任何意圖或企圖做任何嘢。坦白講，嗰件事之後，我匿埋咗係屋企，喊咗三日三夜。我只係用我嘅真性情示人，原來大家會接受唔到，好多前輩亦同我講你唔可以太真，要識得保留，所以依家我講嘢都會小心好多。”