張曦雯自爆日敷兩面膜

首次以素顏上陣拍《企業強人》的張曦雯(Kelly)，皮膚質素甚佳。談到護膚心得，她透露每天會敷至少兩次面膜：“今次我都係第一次開工唔化妝，因為想將喺屋企同埋女強人嘅對比做得大啲。護膚唔可以懶架，如果我開工，朝早起身洗完臉會敷Mask先會化妝，夜晚落晒妝洗晒臉都一定會敷個Mask先至瞓覺，同埋飲多啲水，水份好緊要。”

另外，朱智賢（朱朱）按監製Marco要求剪短頭髮演商界女強人，朱朱透露已超過二十年沒有試過剪短到如此程度：“同監製合作過好多次，所以佢叫我剪咩髮型我都會配合。不過今次真係入行以嚟最短嘅一次，初初剪完都真係有啲唔習慣。”

劇中不時以女強人套裝上陣的朱朱，今次都有參與劇的造型：“今次真係有用心思選擇戲服，每次都會襯過晒先至着出嚟，例如盡量每套衫都會襯返唔同嘅耳環同頸鏈，特別多長耳環，係想感覺霸氣得嚟又唔會太過成熟。”朱朱又笑指自己私下是“女傻人”，完全同女強人扯唔上關係，每次飾演女強人都覺得難度很高，為了演活自信霸氣女強人，朱朱直指整套劇除了冷笑，基本上沒有開心地笑過，並笑言：“拍到塊面都僵硬咗。”