林家棟跣落樓梯叫白車

林家棟前日現身棋人香港十周年紀念發佈會，表示早前因受傷而未能跟《香港經典光影重塑》團隊前往威尼斯出席《Filming Italy Venice Award》活動，領取“傑出貢獻紀錄片”獎項，表示失望。另外，他透露近來正忙編寫劇本，現時要更認真對待劇本，否則很難找人投資，他說：“希望趕到賀歲檔期，但會視乎進度，盡量砌，但起碼要合格以上，要對得住觀眾同投資者。”

談到他的傷勢，林家棟透露已康復八成：“之前落咗幾日大雨，有晚返緊屋企唔小心喺樓梯跣咗落嚟，痛到講粗口，結果要Call白車，而家好返八成。醫生話要自然修復，只畀咗俗稱‘懵仔藥’嘅藥物幫我止痛，而家知道食咗啲藥嘅反應，有助將來演相關角色。”他又笑指當晚因穿了新鞋子，估不到被新鞋所“跣”，因該肌肉觸及神經，痛到觸電一樣，落床都有困難。問到意外可有令他想要找個老婆照顧自己的想法？他開玩笑指有另一個睇法：“條腰都去到咁咯，其實可以唔使娶老婆啦，兩個講法都得嘅。”他坦言習慣了獨居，唔鍾意別人掂他的東西，故不考慮請家傭回來幫忙家務。