感謝董瑋路見不平

伍允龍劉俊謙拍戲投契

伍允龍與劉俊謙日前接受HoyTV主播Angela（俞詠文）訪問，兩人剛剛合作完一部過億票房的電影《九龍城寨之圍城》，之後又於另一套以武替為題材的新片《武替道》再度碰頭。

劉俊謙表示在拍《九龍城寨之圍城》時，和伍允龍已經感覺很投契，相處很開心，而伍允龍亦非常有同感：“記得拜神嗰一日阿謙無端端走埋嚟，自我介紹問我係咪基督徒？我答係，咁等一陣間我哋一齊傾下偈呀！我果刻感覺非常之溫暖。”這套電影高手雲集，伍允龍都是其中之一，但劉俊謙不會覺得有壓力：“我好少會咁樣睇，我會用另外一個角度，當做一個新嘗試，我唔會驚自己做得唔好，我係會嘗試做好佢。裏面九成嘅動作戲，都係自己親身上陣，佢哋都知我份人，唔係好鍾意用替身，見到個樣，梗係想畀人知道係自己做口架啦！”伍允龍立即插嘴持相反意見：“我本身好鍾意用替身，但係唔畀我用，哈哈哈！其實今次嘅動作係唔係太多，而我哋今次嘅動作指導江道海師傅拍攝時好清晰，動作安全亦到位，所以大家都好放心。”

說到《武替道》這套電影可以和前輩董瑋合作，劉俊謙表示非常滿足：“董瑋師傅不嬲都係嚴格嘅，但我覺得佢嘅嚴格同埋要求高係合理囉，佢係想部電影好，想你好先至咁嚴格，其實佢同戲裏面嘅角色好相似，佢係有啲嘢想承傳畀我，無論係戲中或者現實都有呢一種強烈嘅感覺。”而伍允龍就回憶董瑋曾經為自己出頭：“我記得當年我做新人嘅時候，喺片場畀人蝦，呢位師傅即刻企出嚟幫我出氣，嗰刻我就覺得佢唔在乎你地位高定低，路見不平就會出聲。”

其實做武術替身既辛苦又不能出樣，伍允龍亦有問過他們，為什麼會選擇繼續做下去：“好多武替話，人哋唔知冇所謂，我知道係我自己做，就會買飛入場睇。每次都好留意自己做嘅動作，做到啲好難度高嘅動作場面，自己就會有好大嘅滿足感。我成日講，痛楚即係片刻，但係電影係永恆嘅！例如我斷咗隻手，佢係會好返，而拍攝出嚟嘅作品就永遠，所以每一次我都會盡力做到最好。”