鄭希怡：我最醜樣時老公求婚

鄭希怡(Yumiko)接受新城《QK玉瑛室》節目訪問，宣傳下周推出的新歌《Lady King》。原名“鄭列瓊”的Yumiko表示：“首歌係講我自己，因為我細個喺慈雲山讀書，所以有個名叫‘慈雲山瓊姐’。今次首次挑戰唱rap，用咗廣東話、普通話同上海話擺喺入面，這三種語言代表我成長嘅一部分。”

疫情期間Yumiko與老公梁學儲(Andy)及九歲女兒“梁浸浸”舉家移居上海，最近才回流返港。

她表示：“我哋喺上海住咗三年，因為疫情期間咁啱喺內地拍綜藝節目，之後有其他工作同拍戲。我父母一直住喺上海，佢哋就話不如留喺上海，我同老公傾咗之後，佢就帶埋阿女過嚟，一家人一定要一齊。”

Yumiko提到當初並沒想過結婚，卻在二○一二年接受Andy求婚：“嗰年我哋去咗泰國畀個生日驚喜朋友，嗰個朋友就係應采兒，我同佢企喺泳池邊影相，兩個一齊向後跌咗落後面嘅樹林，應采兒掛咗喺樹上，我就跌落兩嚿大石中間。康復期間仲戴住頸箍，行路又唔方便，喺我最醜樣時佢就同我求婚，當時，我覺得呢個男人唔錯。其實我有咩事或傷殘佢可以走，但佢選擇婚姻，咁既然佢願意試，我都願意試。”