狂扭六壬成經典

“貓王”皮禮士利，阿公阿婆當年偶像。油頭粉面，飛仔形格，“披頭四”尚未出世，佢已瘋魔世界。娛圈中生前盡享聲威、身後數十年仍餘韻猶存者，於今數埋冇幾個，乃至今人對“貓王”之名絕不陌生。

當年台上一招扭屎忽花，驚世駭俗，雖未致淫蕩，卻似挑情，有人叫好，有人叫封。有者喻之為“貓乸發姣，貓公叫春”，“貓王”之名由此而來。有理冇理，台上此招，已成經典，後世仿此搵食者，不知凡幾。

上世紀五十年代，貓王事業如日方中，卻被征召入伍。軍方本以其盛名納為軍隊招牌並優待之，佢卻剃個平頭，以平民身份入伍；然派駐期間，每周卻收逾萬歌迷來信，吹脹軍方。

靚仔當風流。有傳貓王曾有三千入幕之賓，唐明皇後宮佳麗亦不外三千耳。如斯風流，加之酗酒啪藥，不惑之年仿如耄耋。四十七年前今日，昏倒於浴室，急救無效，西登極樂，年僅四十二。

西門公子