馬國明唔慣食軟飯

馬國明日前出席首屆“香港好物節”啟動禮，他表示以前很少網購，近年受太太影響才愛上網購，但最愛買工藝品。他說：“又幾方便，網上睇完再去實體店買，慳好多時間，咁我又唔係富三代唔使做，我鍾意買工藝品，我個人好老土，鍾意福祿壽擺設，不過係卡通版嘅，（鍾唔鍾意多仔佛？）我冇買，但阿媽屋企有，如果有朋友送我都唔抗拒。”

他又謂太太平時買衫同飾物比較多，但唔算好瘋狂：“佢篩選過先會幫我買，大家都知我對時裝，真係識條鐵咩！”現場有人讚馬明一身打扮好靚仔，他表示現時都有同香港時裝設計師合作，對方會給他服裝出席活動。

馬國明又大讚老婆賺錢有道，一手包辦網上廣告：“佢近排喺屋企拍社交媒體廣告，自己拍片、剪片、落字幕，燈都自己打埋，一手包辦，我真係好佩服佢，我都好想學。如果社交媒體想搵我哋拍廣告都冇問題，我地可以自己搞掂晒，拍咩都可以，就嚟太太可以養埋我。（咁你有冇畀家用？）梗係有，點可以唔畀，男人係一頭家嘅開支，我係好傳統嘅男人，唔慣食軟飯。佢成日都話我嘅錢係屋企嘅錢，佢嘅錢係佢嘅錢。”