新城廣播台歌《沿途有我》首播

譚玉瑛台歌獻唱大挑戰

新城廣播全新台歌《沿途有我》MV於七月一日踏正凌晨十二時，在新城廣播網絡電視MBO TV啟播的大日子首播，可於新城廣播網上平台及手機APP上收看。

《沿途有我》由馬永齡作曲及監製，新城首席創作總監兼著名填詞人周禮茂帶領新晉填詞人潘源禮共同填詞，歌曲道出人生起跌，只要堅守信念，最後定能撐過。台歌得到一眾歌手好友全力支持獻唱，新城廣播更出動台前幕後總動員合唱及拍攝MV，其中“鎮台之寶”薛家燕、“元祖級”兒童節目主持譚玉瑛、“股壇小辣椒”胡孟青、“鬼王”潘紹聰與及資深音樂主持郭偉安驚喜獻聲。歌手方面包括樂壇一姐楊千嬅、周吉佩、李幸倪、泳兒、梁釗峰、吳業坤、陳葦璇、黃淑蔓、安俊豪、余宗遙、顧定軒、譚嘉荃、林愷鈴及Beanies。

“鎮台之寶”家燕姐開心表示以往只唱過節目主題曲，但為新城唱台歌卻是第一次：“難得請到周禮茂為我哋填詞，首歌嘅旋律好好聽，歌詞正能量，我好欣賞，雖然有啲難唱，不過OK嘅，做一首台歌一定要令人覺得有正能量同挑戰性，幾十人一齊唱，呢個設計好唔簡單，證明佢哋好用心做，希望我唱出嚟唔會失禮，亦都知道喺Steven（馬浚偉）嘅領導下，大家都將所有台同節目做好，好感動。”

主持兒童節目多年的譚玉瑛，早前加盟新城廣播與何基佑、黃筠兒及麥皓兒主持《QK玉瑛室》，這次為台歌獻唱，對她來說是大挑戰。譚玉瑛表示：“我過往幾十年只係唱兒歌，無咁多呢啲抑揚頓挫，今次好彩有麥皓兒教我，尤其係唱歌力度，錄音前，我有聽過首歌，但都唔知點入，平時好少唱歌。（對你好有難度？）因為個音幾高，唱歌對我已經有難度，所以就算幾簡單嘅歌都會覺得難，但好彩有佢哋指導我。”

胡孟青現身錄音室並不是談論財經股票，而是開金口唱歌，雖然只是短短一句歌詞，但青姐表現得相當專業，不時向監製請教如何開聲。她表示：“其實我好憎唱歌，有唱過K，但唱完成個月開咪都會沙聲，所以從來都唔唱，今次成件事好認真，有少少緊張嘅，我畀自己零分，我唔係天才，係‘天菜’。”