與許秋怡李國祥廣州開騷

劉小慧相隔廿七年再踏舞台

劉小慧與同期出道的許秋怡及李國祥一向老友鬼鬼，不過以前因大家屬於不同唱片公司，從未試過合作。現在三人終於有機會在台上合作了，因為他們將於七月十三日到廣州舉行《粵唱越開心》演唱會。離開樂壇很多年的劉小慧笑言：“我今次為了友情，再破例開演唱會，希望留給大家一個美好的回憶。”

日前，劉小慧與好友許秋怡、李國祥相約飯聚。除了三人之外，劉小慧的老公蘇志威及大女蘇君蕎(Yumi)、許秋怡丈夫王書麒及二十歲的囝囝王綽枬(Cody)亦有參與，猶如家庭聚會，溫馨融洽。

劉小慧表示：“想起我哋初入行時，大家都係好窮，但想起呢啲日子，都感到好回味。當時我哋幾個朋友當中，只有李國祥有車，所以大家有時間就會約埋遊車河或者行沙灘，唔使用太多錢，但都玩得開心，行沙灘噃，幾浪漫㗎！”

原來小慧已廿七年沒有開過演唱會，她表示現在心情都好緊張，更自嘲：“要再上舞台，都有啲淆底，唯有加緊排練，以最好的一面獻給觀眾啦！”

她又表示：“我今次再開唱，主要係因為李國祥親自邀請，我先答應㗎。我哋仲為演唱會錄咗首新歌《哼哼這首歌》，回饋支持我哋多年嘅歌迷。今次呢個騷，一向接騷冇停手嘅秋怡都度期演出，因為大家唔係為咗賺錢，最緊要自己開心。”

秋怡亦表示：“今次演唱會上，我終可以過吓跳舞癮。以前我商演時例必唱嘅飲歌《現代愛情故事》同《片片楓葉情》都係慢歌，唱跳歌好少。其實，我因為長期舟車勞頓及坐姿不良，受到坐骨神經痛困擾，睇過很多醫生都冇用。所以今次開唱可以實現我唱跳嘅夢想，但跳舞前都會食定止痛葯！”

談到他們的“星二代”子女，小慧大女Yumi未想過要加入娛樂圈，只係一心想做甜品。而秋怡的囝囝Cody，正在澳洲讀大學，剛有假期便專程返港為爸爸（王書麒）慶祝父親節。他生得高大靚仔，但目前先以學業為重，暫時未想到要加入娛樂圈發展。