方國珊：黎明係我契細佬

日前，現任西貢區議會議員方國珊到新城電台，接受《QK玉瑛室》主持譚玉瑛等人訪問。身為西貢區議會議員，方國珊除了盡責地區工作，亦在疫情後積極復常，振興該區的經濟。適逢日前西貢天后誕，西貢市中心連續數天有大型慶祝活動，方國珊特別介紹，“我哋喺廟附近搭咗個好大嘅戲棚，有粵曲同粵劇演出，今次重頭戲仲引入一百個攤位，有好多文青市集，希望吸引多啲市民嚟玩。”十八歲加入娛樂圈的方國珊，曾參演多套電視劇及電影，因飾演“哪咤”一角深入民心。

她亦與不少圈中人熟稔，更與演藝界長青樹胡楓（修哥）上契，成為修哥眾多契仔契女之一。譚玉瑛在節目中問方國珊最近可有見過契爺，她說：“有呀，佢好威呀，啱啱喺澳門開完演唱會，九十二歲真係破天荒，我會形容契爺係一個宇宙最強的godfather，同埋最好嘅爸爸。”方國珊又大讚契爺為人好sweet和親民，“佢好睇後輩，我同佢好有緣份，幾十年前喺電視台相識，有緣份同森森、斑斑一齊契咗佢做契爺，仲有張學友同黎明，黎明係我契細佬。”方國珊還大爆修哥最近開通了小紅書，並身兼主播四出訪問藝人，“佢話訪問人，啲後生嘅一定企定定，見到佢真係好上進。”