至酷造型獨行俠

奇連伊士活，阿叔聞聲即時彈起。獨行俠三部曲，乃阿叔當年膜拜經典。尤記當年於南灣戲院上映，門前搭起兩層樓高獨行俠巨型畫像，傲視成條新馬路。片頭排笛獨奏主題曲聲如口哨，猶似催魂曲。叔父當年中學雞適逢大考，仍不顧前途，攬住書包去搵獨行俠。

意大利人拍西部片，導演沙治奧里昂獨創一格，撼低傳統美國牛仔片。大銀幕只得兩隻眼核，目之所視，全場震憾。其時風行之電影雜誌《大特寫》，曾喻此舉為“超大特寫”，史無前例。自此，偷師者眾。

奇連伊士活一炮而紅。導演笑言，鍾意奇叔只得兩種表情：一戴帽，一脫帽。佢披氊、挎槍、咬雪茄，幾成當世至酷造型。

奇叔此系列片，亦帶紅兩明星、一配樂家：“勾鼻佬”李雲奇里夫，老戲骨艾利華萊；以及後來獲奧斯卡終身成就獎的意大利作曲家莫里康奈。

今日乃奇叔九十四齡壽誕。

西門公子