次循環開火

澳大護級組爭拆“亭”

【本報消息】本地甲組足球聯賽次循環今日正式展開，今晚七時在氹仔運動場率先上演兩場護級組比賽，澳門大學迎戰榜尾的士砵亭，澳大人腳發揮比士砵亭好，有力睇高半線，繼首循環後再贏一戰。

甲足今季改新賽制，完成首循環後正式分途出擊，展開爭標組及護級組比賽再踢雙循環，今晚率先進行兩場護級組賽事。升班馬澳大在首循環最後一刻跌落第六，只能在護級組繼續今季甲組賽事。

士砵亭唯一未開齋

澳大繼承首循環的分數後，現時以十三分排在護級組榜首，對比今仗對手士砵亭，澳大人腳有優勢，今場雖有楊子軒及葉陽兩名主力停賽，仍有羅偉豪、潘思杰、田宇軒，配合防線門將余偉俊等人掛帥，今季整體發揮較士砵亭好。士砵亭靠隊長胡柏威、主力謝薩斯等領軍夠拼勁，惜今季發揮麻麻，鬥加義一戰先贏後輸，是十支球隊中唯一仍未開齋的。澳大整體表現佔優，有力睇高半線爭勝。

蒙卡尾場硬撼加義

蒙地卡羅在九時鬥加義，兩隊臨近季尾表現均有提升。其中蒙地卡羅增兵加入外援後越踢越好，首循環最後幾場鬥賓菲加、嘉華及澳科鄒北記雖只得一勝兩負，但整體表現不差，譚浩鋒、李文朗、蔡永豪及門將卡斯特羅領軍，人腳比加義好，今仗蒙卡有機坐和望贏。